Onıñ bildirgenine köre, bu raketalarnı Rusiye ordusı Ukrayına energetika infrastrukturasına qarşı ücümlerde qullanacaq ola. Ğumenük qayd etkenine köre, Ukrayına arbiyleri istihbaratnıñ malümatına esaslana, olarğa köre, Qırımda rusiyeliler küçlü arbiy hab yaptı.
«Kalibr» çeşitli raketalar anda toplandı, «Oniks» raketaları da Qırım yarımadasından uçurıla. Duşman küç toplay – belli», – dedi Ğumenük.
«Cenüp» operativ komandanlığınıñ spikeri bildirgenine köre, rusiyeliler raketalarnı uçaqlarğa mindirmege çare olğan yerlerge qoydı.
Oktâbr ayınıñ soñunda Büyük Britaniyanıñ Mudafaa nazirligi istihbaratınıñ malümatına esaslanıp, Rusiye qışta Ukrayına energetik infrastrukturasına qarşı darbe endirmek içün uçucısızlarnen beraber aviatsiya içün silâlarnı toplaydır, dep bildirdi.
2022 senesi oktâbrniñ 10-ndan başlap Rusiye arbiyleri Ukrayınanıñ kritik energetika infrastrukturasına ateş etip başladı, elektrik energiyası problemleri peyda olğan edi. 2023 senesi Rusiye ücümlerni eksiltti, Ukrayına ise küçni ğayrıdan tiklep oldı, elektrik energiyasınıñ itali de yardım etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
