Rusiye Federatsiyası 2014 senesiniñ işğalinden evel Qırımda doğğan ve daima yaşağan ukrayınalılarğa vatandaşlıq berip başlaycaq. Bu buyruqnı Kreml yolbaşçısı Vladimir Putin imzaladı.
Büyük ihtimalnen, laf yarımada zapt etilgen soñ Rusiye pasportını almağan qırımlılar aqqında kete. Rusiye akimiyeti pasport yerine olarğa çetel vatandaşınıñ oturuv iznini bergen edi.
2014 senesi martnıñ 16-na Qırımda ve Aqyar şeerinde yarımada statusınen bağlı sahte referendum olıp keçti. Ondan soñ Rusiye Qırımnı öz erkânına qoştı. Ukrayına, Avropa Birligi, ABD bu rey berüvni tanımadı ve Qırım Rusiye tarafından qanunsız bir şekilde ilhaq etildi, dep bildireler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
