Qırımda Rusiye daa bir vaqıt körmegen muvafaqiyetsizlik köre, dep bildirdi Ukrayına Milliy telükesizlik ve mudafaa şurasınıñ kâtibi Oleksiy Danılov.
«Duşmannıñ (darbelerine – QA) er kün cevap beremiz. Er kün rusiyelilerge zarar ketiremiz. Tek cebedeki çatışma yerinde zararlar aytılmay. Qırım yarımadası ve Rusiyeniñ Qara deñiz flotunı aytsaq, anda körgen zararnı rusiyeliler daa bir vaqıt körmedi», – dep qayd etti o.
Milliy telükesizlik ve mudafaa şurasınıñ kâtibi qayd etkenine köre, Ukrayına «ne teslim olacaq, ne de teslimiyet imzalamaycaq».
«Ukrayına prezidenti bildirgenine köre, küreşimizni devam ettirecekmiz. Toqtamaycaqmız. Zelenskıy ğalebe qazanmağa istey. Teslim olmaycaqmız, bir teslimiyet imzalamaycaqmız, er kes añlasın. Bizim vazifemiz ğalebe ve büyük serbest demokratik memleketniñ quruluvı. Bu bizimki vazifemiz. Er kes istisnasız iştirak etmeli», – dep ayttı Danılov.
Avgust ayında Ukrayına Mudafaa nazirligi Baş istihbarat idaresiniñ yolbaşçısı Kırılo Budanov Qırım.Aqiqatqa bergen intervyüsında Ukrayına quvetleri duşmanğa ücüm etmek içün Qırımda er yerge irişe bile, dep ayttı. Onıñ bildirgenine köre, Qırımnı işğalden qurtarmaq içün çeşit variantlar bar, amma «cenksiz, uruş areketlersiz bunı yapmaq imkânsız».
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
