Rusiye ordusı bazarertesi künü, avgustnıñ 9-nda, Qırımda büyük arbiy talimlerni başlata. O, sentâbrniñ 15-ne qadar devam etecek, dep bildirdi Rusiye Mudafaa nazirligi, dep yaza Azatlıq Radiosı.
Talimler tek işğal etilgen yarımadada degil, Rusiyeniñ Astrahan ve Rostov vilâyetlerinde, Stavropol ve Kubanda, Adıgeya, Dağıstan, Şimaliy Ösetiya, Çeçenistan, Ermenistan ve Gürcistannıñ separatist regionları – Abhaziya ve Cenübiy Ösetiyadaki arbiy bazalarda yerleşken 20 poligonda keçecek.
Talimlerge bütün ordu mütehassıslarını, Qara ve Hazar deñiziniñ gemilerini, 80-den çoq uçaq ve vertoletni celp etmege planlaştırıla.
2014 senesi Qırım işğal etilgen soñ Rusiye yarımadada ve Qara deñizde arbiy talimlerni muntazam sürette keçire, arbiy tehnika, hususan duşman aviatsiyası ile küreş sistemasını ketire. Ukraina ve Ğarp Moskvanıñ bu adımlarını takbih etti.
Sentâbr ayında «Ğarp-2021» Rusiye-Beyazrusiye arbiy talimleriniñ keçirilüvi planlaştırıla. Bu yıl Rusiye bu talimler manaçığınen Ukraina sıñırında ordusını topladı.
Ukraina ve Ğarp Moskvanı ordusını çekmesine çağırdı. Kreml, Rusiye «ordusını öz toprağında istegeni kibi areket ettire, ve kimse buña qarışmamalı», dep bildirgen edi.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
