İşğal etilgen Qırımda Rusiye akimiyeti Rusiye Federatsiyasınıñ Silâlı quvetlerine 15 biñ insannı almağa planlaştıra. Bu aqta Qırımtatar resurs merkeziniñ bağ idarecisi Tatyana Savçuk tarif etti.
Onıñ aytqanına köre, umumen 2022 yılından yarımadada 60 biñ celpname yazıldı, 23 biñ kişi ise seferber etildi.
«Seferberlik qırımtatarlarnıñ Qırımdan kene kütleviy şekilde çıqmasınıñ daa bir sebebi oldı. Tuvğan Qırımdan daa bir sürgünlik dalğası. Qırımlılarnıñ seferberlikke oğramamaq içün tek yarımadadan çıqmaq çaresi bar, başqa bir yol yoq, ne yazıq ki», – dep qayd etti Savçuk FREEDOM telekanalınıñ yayınında.
Onıñ bildirgenine köre, Qırımtatar resurs merkeziniñ uquqçıları seferber olmağan istemegen insanlarğa yardım etti.
«Qırımtatarlardan Ukrayınağa çıqıp, Rusiye Federatsiyasına qarşı cenkleşmege ketken soyları bar. Söz sırası, qırımtatarlar qoluna silâ almay degen bir yalan bar, onı bozmaq içün Ukrayına Mudafaa quvetlerinde olğan qırımtatarlar aqqında tarif etken programmamıznı yaptıq», – dep qoştı aq qorçalayıcı.
Rusiye tayin etken Qırımnıñ arbiy komissarı Yevgeniy Maşukov bildirgenine köre, baarde Rusiye Silâlı quvetlerine 2,5 biñ insannı orduğa almağa planlaştıra.
Rusiye prezidenti Vladimir Putin baarde Rusiye ordusına arbiy hızmetke aluv buyruğını imzaladı. Askerlikke aluv aprelniñ 1-nden iyülniñ 15-ne qadar devam etecek.
Ukrayına prezidentiniñ Qırım Muhtar Cumhuriyeti ve Aqyar temsilciligi Rusiye Federatsiyası Silâlı quvetlerinde askerlikke mecbur etilgen Qırımdaki Ukrayına vatandaşlarını bunı bildirmege çağırdı. Müessise emin ki, Qırımda Ukrayına vatandaşları askerlikten qaçınmağa tırışsa da, Rusiye akimiyeti olarnı cinaiy taqip vastasınen orduğa almağa tırışacaq. 520 adise belli, 206-sı 2022 senesi fevralniñ 24-nden soñ qayd etildi.
Ukrayına prezidentiniñ Qırım Muhtar Cumhuriyetindeki temsilciligi bildirgenine köre, Rusiye Federatsiyası Silâlı quvetlerine 18 «hızmetke çağıruv kampaniyası» vaqtında umumen 44,5 biñ qırımlı alındı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
