Reuters agentligi Rusiye ordusınıñ Qırım şimalindeki Canköyde teminat bazalarınıñ eki yoldaş fotoresimini derc etti. Fotoresimler aprelniñ 6-nda Maxar Amerika şirketi tarafından yapıldı.
Foreign Policy Amerika mecmuasınıñ milliy telükesizlik meseleleri mühbiri Jack Detsch Twitterde Rusiye Ukraina cenübinde ve işğal etilgen Qırımda eki arbiy teminat bazasını yaptı, dep bildirdi.
Detsch, ABD resmiy şahıslarına esaslanıp, Ukraina cenübinde 55 Rusiye batalyon-taktik gruppası cenkleşe, dep haber etti.
Daa evel haber etilgenine köre, Maxar yoldaş fotoresimleri Ukraina şarqında Rusiye ordusı yerleşkenini kösterdi.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Aprelniñ başında Moskva Ukraina şimalinde faal olğanını toqtattı, dep bildirdi. Tezden Ukraina akimiyeti Kyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
