Rusiye Federatsiyasınıñ Tış işler nazirligi saba uçucısızlarnıñ Qırım ve Moskvağa qarşı ücümlerini izaatlap, «sert cevap tedbirlerini alacaq», dep bildirdi.
«Olıp keçkenlerni Ukrayınanıñ arbiy-siyasiy reberligi tarafından terror usulları, vatandaş ealisini qorquzuv olaraq tanıymız… Rusiye tarafınıñ sert cevap tedbirlerini almaq aqqı bar», – dep aytıla Rusiye Tış işler nazirliginiñ haberinde.
Rusiye Tış işler nazirligi Ukrayına dijital transformatsiya naziri Mıhaylo Fedorovnıñ malümatına esaslanıp, Ukrayına reberligini bu ücümlerde qabaatladı. Rusiye tarafı Ukrayına uçucısızlarnıñ ücüminden mesüliyetini resmiy şekilde tanıdı, dep bildirdi, amma Fedorov Ukrayınanıñ alâqası aqqında tam bir şey aytmadı.
«Bugün gece uçucısızlar orklarnıñ paytahtı ve Qırımğa ücüm etti. Radioelektron vastalar ve ava mudafaa quvetleri işğalcilerni qorup olamay. Anda ne olsa olsun, amma bu olmaycaq», – dep yazdı Fedorov Telegram kanalında.
Ukrayına resmiy şahıslarınıñ Moskva ve Qırımğa qarşı ücümlerinen bağlı diger izaatları daa yoq edi.
İyülniñ 24-nde saba eki uçucısız cihaz Moskvağa ücüm etti. Bu aqta şeer yolbaşçısı Sergey Sobânin bildirdi. Ciddiy zararlar yoq, kimse yaralanmadı, dep haber ete Moskva akimiyeti.
Uçucısızlardan biri şeer merkezine yaqın Komsomolskiy caddesi rayonında tüşti, №17 ev zarar kördi, dep haber etti Rusiye TASS agentligi acele hızmetlerdeki menbasına esaslanıp. Bu yerge yaqın Frunzenskaya yalı kenarında Rusiye Mudafaa nazirliginiñ binası buluna.
İyülniñ 24-nde saba Aksenov Qırımda 11 uçucısız tesirsiz alğa ketirildi, dep bildirdi. Canköy rayonında silâ anbarından ğayrı, uçucısız parçaları İslâm Terek rayonındaki mesken evge zarar ketirdi. Canköy rayonınıñ bir qaç köyünde tahliye ilân etildi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
