Rusiye Mudafaa nazirligi 2022 senesi peyda olacaq eki yañı arbiy poligon qurulacağını ilân etti, bir danesi işğal etilgen Qırımda olacaq.
«2022 senesi bir qaç desant-ücüm ve top bölügine zemaneviy tehnika berilecek, İvanovo vilâyetinde «Sinâya Osoka» ve Qırımda «Starokrımskiy» yañı poligonları donatılacaq», – dep aytıla Rusiye Federatsiyasınıñ Mudafaa nazirligi haberinde.
Küzde kütleviy haber vastaları istihbaratnıñ malümatına esaslanıp, Ukraina sıñırında Rusiye ordusı toplana, dep bildirgen edi. ABD ve Ğarp memleketleri Moskva yañı büyük arbiy ücüm azırlay, dep tahmin etti.
Kreml bu laflarnı inkâr etip, ABD ve NATOdan telükesizlik kefaletlerini talap etti – hususan, NATOnı şarqqa kenişletmemek ve eski sovet cumhuriyetlerini arbiy ittifaqnıñ yañı azaları sırasına almamaq.
Ukraina milliy telükesizlik şurasınıñ kâtibi bildirgenine köre, Kyiv Rusiye tarafından ücüm telükesini körmey. Oleksiy Danılovnıñ aytqanına köre, şimdilik Moskvanıñ ücüm etmege imkânı yoq.
