Rusiyeniñ Qazanında Ukrayınadaki cenkniñ yılına bağışlanğan memorial peyda oldı. Fotoresimni SOTA Telegram kanalı derc etti.
Lenin bağçasındaki siyasiy repressiyalarnıñ qurbanlarına yapılğan abide yanında Buça, Mariupol, Dniprodaki adiselerniñ fotoresimleri ve «Putinniñ cenkine yoq» yazuvlı şiar qoyuldı.
Cenkke qarşı memorial Tomskta da peyda oldı. Şeerniñ haçı ögünde sarı-mavı şeritli çeçekler ve «Dnepr 14.01.2023 Ukrayına 24.02.2022» yazuvlı levha qoyuldı. Yerli sakinler aktsiyalarnı keçire bilecek yerlerde polis hadimleri nevbetçilik yapa.
Fevralniñ 23-nden 26-na qadar dünyanıñ bir çoq şeerinde «Işıq qaranlıqnı yeñecek» şiarlı Ukrayınağa qoltutuv aktsiyaları keçirile. Olarnı Ukrayına cemiyetleri ve diasporaları teşkil ete. Aktsiyalarnıñ teşkilâtçılarından biri ve kampaniya koordinatorı – Ukrayına cemiyetleriniñ birleşmesi – Communities Army of Ukraine.
Kampaniyanıñ maqsadı – cenkni toqtatmaq ve Ukrayınanıñ mustaqillik ve topraq bütünligini saqlav küreşinde ğalebeni temin etmek içün Ukrayınağa qoltutuv kerek olğanını qayd etmek ve Rusiyege qarşı sanktsiyalarnı quvetleştirmek.
Bıltır fevralniñ 24-nde Rusiye bütün sıñırda ve Beyazrusiyeden Ukrayınağa tam istilâ başlattı. Ukrayına Silâlı quvetleriniñ Baş ştabı malümatına köre, Rusiye bu vaqıt devamında Ukrayınağa aman-aman beş biñ raketa attı.
BM eñ az 8006 vatandaşnıñ ölümini qayd etti – daa 13 287 kişi soñki 12 ayda yaralandı. Teşkilât kerçek raqamlar daa yüksek, dep qayd ete.
Kreml istilânı inkâr etip, yapqanlarını «mahsus arbiy operatsiya» dep adlandıra. Onıñ maqsadı olaraq ise «Ukrayınanıñ askeriylesizleştirilüvi ve denatsifikatsiyası» ola eken.
Ukrayına Silâlı quvetleriniñ vekili Yuriy İgnat Arbiy ava quvetleri fevralniñ 23-24-nde Rusiyeniñ provokatsiyalarını bekley, dep ayttı. Onıñ bildirgenine köre, Ukrayına arbiyleri quvetleştirilgen nevbetçilik tuta.
Ukrayına Mudafaa nazirliginiñ Baş istihbarat idaresiniñ yolbaşçısı Kırılo Budanovnıñ fikirince, Rusiye fevralniñ 24-ne «büyük olmağan raketa darbesini» planlaştıra bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
