Rusiye işğal etilgen Qırmğa ağır arbiy tehnikanı yollap başladı. Bunıñ aqqında OSCE-deki ABD missiyasınıñ reis muavni vazifesini vaqtınca icra etken Elizabet Rozenstok-Sillerniñ beyanatında yazıla.
Onıñ malümatına köre, Rusiye yarımadağa desant-ücüm aviatsiyasını, T-72B3 tanklarnı, 120 milimetrlik mina topularını, gaubitsalarnı ve zırhlı tehnikanı yollay.
«Biz Rusiyeni Qırımdaki basqılarnı toqtatmağa ve bütün ukrain siyasiy mabüslerni azat etmege çağuramız. Bundan ğayrı Rusiyeni Qırımnıñ işğalini ve arbiyleştirilüvini toqtatamağa ve Ukraina şarqından bütük küçlerni ve tehnikasını keri çekmege çağıramız», – qayd etile beyanatta.
Aprelniñ 22-nde OSCE Daimiy şurasınıñ onlayn oturışı vaqtında Elizabet Rozenstok-Siller, ABD Rusiyeni işğal etilgen Qırımda arbiy bulunuvınıñ arttırmasını toqtatmağa çağırdı.
Rusiye Mudafaa nazirligi, Qırımdaki talimlerde iştirak etken soñ Rusiye Qara deñiz flotunıñ 20-den ziyade gemisiniñ daimiy yerleşme yerlerine qayttı, dep iddia ete.
Aprelniñ 22-nde, cumaaqşamı künü, Rusiye Mudafaa nazirligi Rusiye arbiy idaresiniñ başı Sergey Şoygunıñ da iştiragı ile «türlerara talimler» keçirdi. O, Cenübiy ve Ğarbiy arbiy bölglerden arbiy talimlerniñ yekünlenmesi ve ordunıñ daimiy yerleşme yerlerine keri çekilmesini de bildiri. Rusiye Mudafaa nazirligi, Rusiyeniñ cenübindeki ve işğal etilgen Qırımdaki talimlerde iştirak etken quvetlerniñ daimiy yerleşme yerlerine qaytmağa başlağanlarını bildirdi.
Ukraina prezidenti Volodımır Zelenskıy, Rusiye işğal etilgen Qırımdan Ukraina sıñırı ve vaqtınca işğal etilgen topraqlardan ordusınıñ keri çeküv esnasında tek 3,5 biñ askerini çıqarğanını bildirdi.
Soñki aftaları Ukraina ve ğarbiy ittifaqdaşları 2014 senesinden berli Ukrainanıñ şarqiy sıñırlarında, işğal etilgen Qırımda, Qara ve Azaq deñizlerinde Rusiyeniñ asker sayısı iç olmağanı qadar arta, dep bildire. Moskva, Rusiye ordusınıñ Rusiyede (olar Ukrainağa ait Qırımnı da sayalar) areket etmesi diger memleketlerni, hususan Ukrainanı qasevetlendirmemeli, dep qayd ete.
