Qırımnıñ ilhaqından soñ Rusiye akimiyeti qırımtatarlarnı "sistemli ve şiddetli taqibatqa" oğrata, yarımadanı ise arbiy bazağa çevire. Bunı öz Facebook saifesinde qırımtatar Milliy Meclisiniñ reisi Refat Çubarov yazdı.
Onıñ aytqanına köre, Qırımda siyasiy mabüslerniñ çoqusı bu qırımtatarlardır.
"Putin 2-nci Yekaterina ve Stalinniñ "Qırımtatarlarsız Qırım" printsipine uya. Moskova, Qırımnıñ tamır halqı qırımtatarlarnı tatamıle dağıtmaq icün acele tarzda Qırım toprağına öz vatandaşlarını köçtire", - qayd etti Çubarov.
Bundan ğayrı Meclis başı, ilhaqtan soñ Rusiye "biñlerce qırımtatarlarnı vatanlarında yaşamaqtan marum qaldırğanını" qayd etti.
Bu sene mart ayınıñ soñunda Rusiye Tahqiqat komiteti Qırımtatar Milliy Meclisiniñ reisi Refat Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212 maddesiniñ 1-inci qısmı (qalabalıqlarnı teşkil etüv), 280.1 maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq faaliyetke açıq çağıruv) açıldı.
Çubarovnıñ qayd etkenine köre, Rusiye akimiyeti «qırımtatar halqına qarşı daa bir repressiya dalğasını başlattı».
Advokat Nikolay Polozov Rusiye tahqiqatçısınıñ onı işğal altındaki Qırımda Çubarovğa qarşı kene açılğan davada imayeden çetleştirmek niyeti aqqında bildirdi.
Qırım Muhtar Cumhuriyetiniñ prokuraturası, Rusiye tahqiqatçılarınıñ Çubarovğa qarşı açılğan davanen bağlı tahqiqat başlattı.
