Rusiye Qırımnı ilhaq etkende yarımadanı sakinleri içün apishanege çevirdi, anda insan aqlarınıñ bozuluvı ve repressiyalar er kün yüz bere. Bu aqta Forum 2000 halqara konferentsiyasında Ukrayina prezidentiniñ QMC-deki daimiy temsilcisiniñ muavini Ölğa Kurışko bildirdi.
Kurışko "Açıq apishanede on yıl: işğal etilgen Qırımda insan aqları" mevzusında panel munaqaşasında çıqışta bulundı. Muzakerede Çehiya Tış işler nazirliginiñ İnsan aqları ve keçici müddet siyaseti departamentiniñ müdir muavini Zdenko Tsaysova, ZMINA insan aqları Merkeziniñ leyhalar meneceri Viktoriya Nesterenko ve yaqında Rusiye esirliginden azat etilgen qırımlı Leniye Umerova iştirak ettiler.
"Hatırlamaq kerek ki, Rusiyeniñ Ukrayinağa qarşı cenki 2014 senesi Qırım işğalinden başlandı. Birinci qurbanlar em arbiy, em de vatandaşlar, tamam mında oldı. Biz Rusiye askerleri tarafından öldürilgen ukrayin arbiyleri Sergey Kokurin ve Stanislav Karaçevskiyni hatırlaymız. Vatandaşlar arasında birinci qurban qırımtatar faali Reşat Ametov oldı, o, işğalge qarşı narazılıq bildirgeni içün hırsızlandı ve öldürildi. Ervin İbragimov kibi eñ azdan 14 qırımlı faaller ğayıp oluv qurbanları oldı. Olarnıñ taqdiri belli degil. Bugünge qadar 218 Qırım sakini Rusiye tarafından qanunsız sürette apiske alındı, olardan 132 qırımtatar", — dep qayd etti Ukrayina prezidentiniñ Qırım Muhtar Cumhuriyetindeki temsilcisiniñ muavini.
Bundan da ğayrı, Kurışko Temsilcilikniñ Qırımğa nisbeten azırlağan reintegratsiya siyaseti, hususan, kognitiv işğalden azat etüv, devlet memuriyeti organlarınıñ ğayrıdan tiklenüvi, iqtisadiy ğayrıdan tiklev, mülkiyet aqqı meseleleri, biznesni qaytaruv ve ilâhre aqqında tarif etti.
Kurışko çıqışta bulunıp, vaqtınca işğal etilgen topraqlarda işğalge qol tutqan ve Ukrayina vatandaşlarınıñ aqlarını bozğan şahıs ve teşkilâtlarğa qarşı sanktsiyalar siyasetini quvetleştirmek müim olğanını qayd etti.
Soñunda Ölğa Kurışko konferentsiya iştirakçilerini Qırım platformasına qoşulmağa çağırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.