Ukrainanıñ vaqtınca işğal etilgen topraqlarnıñ reintegratsiya meseleleri nazirligi emin ki, Rusiye dünya toplulığınıñ diqqatı işğal etilgen Qırımda olmasın ve işğalniñ soñu kelmesin dep, Donbas problemlerini qullanmağa tırışa.
Bu aqta Ukrainanıñ vaqtınca işğal etilgen topraqlarnıñ reintegratsiya meseleleri naziriniñ muavini İgor Yaremenko ayttı.
Onıñ qayd etkenine köre, al-azırda işğal etilgen Donbasnıñ reintegratsiya meselesi tek Qırımnen beraber baqıla.
«Ebet, ileride qolay olmağan bir yol bekley. Çünki Donbasnıñ telükesiz reintegratsiyası büyük ğayret ve resurs talap ete. Rusiye Federatsiyası, Ukrainağa ait yarımadanıñ işğalini qanunlaştırmaq içün Qırım meselesinde diqqat olmasın dep, bunı öz menfaatları içün qullanmağa tırışacaq», – dep bildire Yaremenkonıñ aytqanlarını Ukraina nazirliginiñ matbuat hızmeti.
Ukraina akimiyeti AB ve Ğarp memleketlerini Yarımadanı işğalden qurtaruv Qırım platformasına faal sürette iştirak etmege davet ete. Tış işler naziri Dmıtro Kulebanıñ bildirgenine köre, Qırımnı işğalden qurtaruv sammitini Kyivde 2021 senesi mayıs ayında keçirmege planlaştıralar.
Qırımnı işğalden qurtaruv halqara meydançığı – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
