Rusiye ükümeti Qırım yarımadasınıñ içtimaiy-iqtisadiy inkişafı devlet programmasını 2025 senesine qadar uzattı, dep bildire Rusiye kütleviy haber vastaları qararğa esaslanıp.
«İnterfaks» agentligi yazğanına köre, bu programmanıñ maddiy desteklenmesi aman-aman 1,7 qat arttı, 712,05 mlrd rublege qadar.
Qırım ve Aqyarnıñ içtimaiy-iqtisadiy inkişaf devlet programması 2019 senesi yanvar ayında qabul etildi. O, bir etapta (2019-2022 seneleri) yapılacaq edi, programmanıñ umumiy bücet tahsisi, soñki malümatqa köre, 429,09 mlrd ruble oldı. Devlet programmasını yerine ketirecek esas mehanizm Qırım ve Aqyarnıñ federal inkişaf programması olacaq.
2020 senesi sentâbr ayında berilgen malümatqa köre, Rusiyeniñ «Qırım ve Aqyarnıñ içtimaiy-iqtisadiy inkişafı federal programmasınıñ» maliye etilüvi 2021-2022 seneleri planlaştırılğanından 20% az olacaq.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
