Rusiye vekilleri Ukrayina tarafınen qırımlı siyasiy mabüslerniñ, şu cümleden qırımtatar halqınıñ vekilleriniñ meselelerini muzakere etmek pek istemeyler. Bu aqta Ukrayina Yuqarı Radasınıñ insan aqları vekâletlisi Dmıtro Lubinets "2014-2024 on yıllığı . İnsan aqlarını ğayrıdan tiklep. Demokratiyanı saqlap" adlı halqara aq qorçalayıcı konferentsiyasında bildirdi, dep bildire "Suspilne".
"Rusiye Federatsiyasınıñ temsilcileri ile doğrudan-doğru qonuşqanım vaqtında, olar 2014 senesinden berli ukrayin Qırımında tutulğan qırımtatar halqınıñ siyasiy mabüsleriniñ meselelerini muzakere etmek istemeyler, dep tasdıqlay bilem", — dep ayttı Lubinets.
Onıñ aytqanına köre, bu meseleniñ muzakeresinde Türkiye faal iştirak ete, onıñ sayesinde siyasiy mabüslerniñ bir qısmı qaytarıldı. Lubinets kim aqqında laf etkenini aytmadı.
"Men şahsen Türkiyege bir qaç kere barğan edim, Türkiye prezidenti Erdoğan ile körüşken edim. Türkiye ombudsmeni bizim ile daimiy bağda buluna. Çoq şey aytıp olamayım, amma eminliknen ayta bilem ki, bu memleket pek çoq şey yaptı, ve siyasiy mabüslerniñ qaytarıluvı meselesi köterildi ve qaytarıldı", — dep bildirid Ukrayina ombudsmanı.
O şunı da qoştı ki, Ukrayina Rusiyege siyasiy mabüslerniñ azat etilüvi meselelerinde em yañı aracılar, em de basqı mehanizmlerini qıdırmağa devam ete, em de dünyağa olarnıñ aqlarınıñ bozuluvı aqqında haber etmege tırışa.
"Biz atta ayrı malümat brifingi azırladıq, onı "Qırım platforması" sammitinde Kıyivge kelgen bir çoq memleketniñ vekillerine berdik, men zenaatdaşlarımnen beraber Ukrayinağa ait Qırımnıñ Rusiye Federatsiyasınıñ qanunsız ilhaqı meselesinde onlayn munaqaşa teşkil etken edim", — dep qoştı Lubinets.
QRM-niñ malümatına köre, Rusiye Qırım yarımadasını ilhaq etkeninden berli 370 siyasiy sebepli cinaiy taqip qayd etildi, olardan 228 qırımtatarlarğa qarşı.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
