ABD OSCE elçisi James Gilmore Rusiyeni qırımlı advokat Lilâ Gemeciniñ işine keder etmekni toqtatıp, siyasiy mabüs Ukraina vatandaşlarını azat etmesine çağırdı. Bu aqta o, noyabrniñ 5-nde OSCE Viyanadaki Daimiy şura toplaşuvında.
«Bizni işğalci akimiyetniñ qırımtatar advokatı Lilâ Gemecini bir qaç siyasiy mabüske bergen qoruv sebebinden advokat statusından marum etüv ıntıluvları aqqında haberler qasevetlendire. Bir çoqumız Gemeci hanım ile mında 2019 senesi körüştik ve Rusiyeniñ repressiya siyaseti ögünde cesürligi fedakârlığından ayrette qaldıq. Rusiye onıñ işine keder etmek ıntıluvlarından vazgeçip, adaletsiz bir şekilde apishanege oğratqan er kesni azat etmeli», – dedi ABD elçisi.
James Gilmore qayd etkenine köre, Qırımnıñ Rusiye akimiyeti «qırımtatarlar, etnik ukrainler ve işğalge qarşı çıqqan er keske qarşı büyük repressiyalar yapmağa» devam ete.
Rusiye vekilleri ABD elçisiniñ aytqanlarını izaatlamadı.
Bu sene avgust ayında Rusiyeniñ Rostov-na-Donu şeerindeki Cenübiy okrugınıñ arbiy mahkemesi advokat Lilâ Gemecige qarşı şahsiy qarar çıqardı. O, mahkemede qırımlı aq qorçalayıcı ve «Qırım birdemligi» cemaat birleşmesiniñ koordinatorı Server Mustafayevniñ menfaatlarını temsil etti. Mustafayev 2020 senesi sentâbrniñ 16-nda 14 yıl sert rejimli koloniyada qalmasına üküm etildi. Faal Amnesty International tarafından vicdan mabüsi olaraq tanıldı.
