Saba Krıvıy Riğde bir qaç patlav yüz berdi. Yerli akimiyetniñ malümatına köre, infrastruktura obyektine zarar ketirildi ve yanğın çıqtı.
Dnipropetrovsk vilâyetiniñ arbiy memuriyetiniñ yolbaşçısı Serğiy Lısaknıñ bildirgenine köre, darbe neticesinde 47 yaşında qadın elâk oldı. Daa soñra o, yaralanğanlarnıñ sayısı artqanını bildirdi.
"Krıvıy Riğde endi doquz yaralanğan bar. Yedi hastahanege alındı, olardan üçü ağır alda", — dep bildirdi o.
Lısaknıñ aytqanına köre, darbe vatandaş obyektlerine endirildi. O, infrastruktura, çoq qatlı binalar, memuriy binalar, avtobuslar, garajlar, 15-ten ziyade yengil avtomobil, tükân ve oquv yurtuna zarar ketirdi. Darbe neticesinde çıqqan yanğınlar söndürildi, dep qoştı vilâyet yolbaşçısı.
Rusiye arbiyleri Ukrayina regionlarına çeşit silâlarnen muntazam sürette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
