Rusiye işğal etilgen Ukrayina topraqlarından 4 biñden ziyade balanı Qırımğa alıp ketti, dep bildire Milliy tirenüv merkezi.
Qayd etilgenine köre, olarnıñ bir qısmı yarımada mekteplerine, diger qısmı bala bağçalarına alınğan.
"Böyle areketler — bu, balalar içün yalıñız oquv yeriniñ deñiştirilmesi degil de, olarnıñ ukrayin kimligini yoq etmek, olarnı Rusiye Federatsiyasınıñ uquqiy ve tasil alanına zornen qoşma ve olarnı istilâcı memleketniñ vatandaşları olaraq tanıma ıntıluvıdır. Rusiye halqara gumanitar uquqınıñ qaidelerini boza, bu ise istilâcığa balalarnı sürgün etmekni ve mecburen başqa yerge avuştırmaqnı yasaq ete. Amma Kreml, ukrayin balalarını qorqutuv, manipulâtsiya ve şantaj usullarını qullanmağa devam ete", — dep aytıla haberde.
Milliy tirenüv merkezinde, umumen, Rusiye Federatsiyası 20 biñden ziyade ukrayin balanı işğal etilgen topraqlardan qanunsız sürgün etti, dep qoştılar. Daa 1,5 million kişi sürgünlik telükesi altında qala.
"Bundan da ğayrı, duşman qaçırılğan balalarnıñ şahsiy malümatını ve vatandaşlığını deñiştirip, olarnıñ evlerine qaytmasını imkânsız yapa", — dep qayd ettiler Milliy tirenüv merkezinde.
Ukrayinanıñ resmiy malümatına köre, cenk vaqtında Rusiyede ve işğal etilgen topraqlarda 20 biñden ziyade ukrayin balası qaldı. Yuqarı Radanıñ insan aqları boyunca vekâletlisi Dmıtro Lubinets, Rusiye Ukrayinadan 150 biñge yaqın balanı qanunsız sürgün etti, dep tahmin ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
