Ukraina prezidenti Volodımır Zelenskıy, işğal altındaki Qırımda suv problemlerine baqmadan, Rusiye esas Ukrainağa yarımadadan ücüm etmeycek, dep ümüt ete. Aks alda, onıñ fikirince, büyük cenk çıqar.
Bu aqta o, «Fokus» neşiri içün bergen intervyüsında ayttı.
«Bu qorqunç bir şey, tasavvur etmege bile istemeyim. Buña (Qırım tarafından ücümge – QA) qarşı çıqam. Bu imkânsız dep ümüt etecekmiz. Yoqsa büyük cenk başlar. Biz bir yerge ketmeycekmiz, er kes birleşecek – em erkekler, em qadınlar. Bu Ukraina ealisi içün yaramay olacaq. Ve Rusiye bunı añlay, dep tüşünem», – dep qayd etti Zelenskıy.
Kreml, esas Ukrainadan «qara koridor yapmağa» ve işğal etilgen Qırım içün suv berilüviniñ blokunı lâğu ettirmege tırışa, dep bildirdi noyabrniñ 25-nde istifada olğan ABD Silâlı quvetleriniñ general-leytenantı, ABD Avropa qara küçleriniñ sabıq komandanı Ben Hodges.
Bundan evel Rusiyeniñ Qırımğa qara koridorını yapmaq içün Rusiye Silâlı quvetlerini qullanmaq planları aqqında Ukraina istihbaratı aqqında bildirdi. Daa soñra Ukraina komandanlığı şimdilik böyle esaslar yoq, amma Ukraina arbiyleri Ukraina ordusınıñ Qırım tarafındaki arbiy imkânlarını arttırmaq içün çalışa, dep qayd etken edi.
Yarımadada suv vaziyeti qıyın qala. Dekabr ayında Qırımnıñ Rusiye mesken-kommunal hocalıq nazirligi Qırımnıñ suv anbarları aqqında malümatnı derc etti. Oña binaen, yarımadanıñ eñ az beş suv anbarı «ölü miqdar» seviyesine yaqın.
Rusiye prezidenti Vladimir Putinniñ fikirince, Qırımda Azaq deñizi yaqınlarında tatlı suv yedekleri bar. Qırımnıñ Rusiye yolbaşçısı Sergey Aksenov, mütehassıslar Azaq deñizi yaqınlarında tatlı suv çıqaruv imkânlarını tedqiq etip başladı, dep bildirdi.
