Ukraina Tış işler naziriniñ birinci muavini Emine Ceppar BMT Şurası vaqtında, Rusiye akimiyeti pandemiyağa baqmadan işğal etilgen Qırım yarımadasında basqıcı kampaniyasını devam ete ve ilk nevbette qırımtatarlağa qarşı, dep bildirdi. Bu aqta Ukraian TİN matbuat hızmeti haber ete.
Böylece, Ceppar qayd etti ki, koronavirus alâmetleri olğan siyasiy mabüsler ve şahıslar Qırımda kerekli tibbiy yardımdan marumdırlar.
“O, koronavirusnen hastalanğan ve buña baqmadan ceza izolâtorına avuştırılğan siyasiy mabüs Teymur Abdullayevniñ vaziyetine diqqat çekti. Dörtünci Jeneva şartnamesiniñ talaplarına baqmadan Rusiye pandemiyanı toqtatmaq içün çareler körmey ve aksine kütleviy tedbirler keçire, qanunsız sürette askerlikke celp ete ve kerçek raqmlarnı gizley, dep qayd etti diplomat”, – yazıla bilidrmede.
Bundan ğayrı Emine Ceppar qayd etkeni kibi, Rusiye yarımada ve Ukraina qıtası arasında qatnavnı pek sıñırlağan, bu ise yarımdanıñ demografik vaziyetine menfiy tesir ete.
Ukraina prezidenti Volodımır Zelenskıy işğal etilgen Qırım ve ORDLO sakinlerini koronavirustan vaktsiyanatsiya yapmağa söz berdi. Onıñ bildirgenine köre, Ukraina Sağlıq saqlav nazirligi milliy vaktsinatsiya planını endi azırlağan.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
