İlhaq etilgen Qırımda 1,5 biñ yer olacaq yañı tahqiqat izolâtorını qurmağa planlaştırıla. Bu aqta Rusiyeniñ devlet satın aluvları saytında haber etile.
Berilgen malümatqa köre, SİZO Aqmescit rayonında eki etapta qurulacaq. Başta – 40,8 biñ metr kârelik alanda 1 biñ yer, soñra – tahminen 13,6 biñ metr kârelik alanda 500 yer.
Devlet satın aluvları malümatına köre, yañı izolâtorğa 3 mln ruble sarf etilecek. Sermiya federal bücetten ayırılacaq.
Rusiyeniñ Qırım işğalinden soñ yarımadada SİZO problemi peyda oldı. Yekâne tahqiqat izolâtorı Aqmescitte yerleşe ve rıqma-rıq tolu, dep aytqan edi Rusiye Baş prokurorı Yuriy Çayka ve Qırımnıñ Cezalarnı yerine ketirüv federal hızmetiniñ reberligi.
2018 senesi Qırımda qavğa çıqtı. Cezalarnı yerine ketirüv federal hızmetiniñ müdir muavini Oleg Korşunovğa qarşı cinaiy dava açıldı. Rusiye Tahqiqat komiteti memurnı Aqmescitte SİZO qurğanda 200 million ruble israf etkeninde qabaatladı.
