New Yorktaki Jurnalistlerni qoruv komiteti işğal etilgen Qırımda tutulğan Azatlıq Radiosınıñ ştattan tış hadimi (Qırım.Aqiqat leyhası) Vladislav Yesipenkonıñ acele azat etilmesini talap ete. Bu aqta martnıñ 18-nde paylaşılğan teşkilâtnıñ beyanatında aytıla.
«Rusiye akimiyeti jurnalist Vladislav Yesipenkonı acele azat etip, sahte qabaatlavnı lâğu etmeli ve qırımlı jurnalistlerni taqip etmemeli ve qorquzmamalı», – dep qayd etti Avropa ve Merkeziy Asiyadaki Jurnalistlerni qoruv komitetiniñ programma koordinatorı Gülnoza Said.
«Rusiye akimiyeti tarafından deñişken qabaatlavlar ve Yesipenkonıñ qorantası saylağan advokatnı körmemesi oña qarşı qabaatlav uydurılğanını ve yerli matbuatnı sustırıp qorquzmaq içün yapılğanını köstere», – dep qoştı Gülnoza Said.
Amerika Birleşken Devletleri «Qırımda Rusiye tarafından siyasiy sebeplerden Vladislav Yesipenkonıñ tutuluvını» resmiy şekilde takbih etti.
Martnıñ 16-nda Rusiye FSBsiniñ cemaat alâqaları merkezi, martnıñ 10-nda Qırımda Vladislav Yesipenko «Ukraina mahsus hızmetleriniñ menfaatları içün» malümat toplağanı sebebinden tutuldı, dep bildirdi.
FSB bildirgenine köre, Yesipenko Qırımda yaşayış ve insanlar toplaşqan yerlerniñ foto ve videolarını çıqarğan edi. Mahkeme onı Qırımda apiske aldı.
Müessise, Yesipenkonıñ şaatlığına esaslana. O, «Ukraina Tış istihbarat hızmetiniñ 5-inci departamenti 8-inci yedeginiñ zabiti polkovnik Kravçuk V.A. emrinen Ukraina mahsus hızmetleriniñ menfaatları içün malümat topladı ve onıñ tevsiyesinen telükesizligini qorumaq içün maşinasında el yapılğan patlayıcı cihaznı saqladı», dep aytqan eken. Kreml kontrolindeki mahkeme Yesipenkonı mayısnıñ 11-ne qadar apiste qaldırdı.
Ukraina Tış istihbarat hızmeti, FSBniñ Vladislav Yesipenkonıñ Ukraina mahsus hızmetleri ile işbirligi aqqında malümatını Qırım.Aqiqatqa aytıp, «Rusiye mahsus hızmetleriniñ provokatsiyalarını izaatlamay», dep bildirdi.
«Qırım işğaliniñ yılı arfesinde bu propaganda aktsiyası – ealiniñ diqqatını yarımadanıñ iç problemlerinden uzaqlaştırmaq içün yahşı bir manaçıqtır», – dep qoştı Ukraina Tış istihbarat hızmetiniñ matbuat hızmeti.
Qırım Muhtar Cumhuriyetiniñ prokuraturası, Ukraina uquq qoruyıcıları Qırımda Vladislav Yesipenkonıñ tutuluvı ve apiske alınması sebebinden cinaiy tahqiqat başlattı, dep bildirdi.
Ukraina Tış işler nazirligi Qırımda tutulğan Vladislav Yesipenkonen mustaqil advokatnı körüştirmege talap ete.
