Aqmescitte Rusiye memuriyeti tarafından teşkil etilgen "Rusiyede milletlerara birlik saqlav ve vatanperverlikni pekitüvde musulman qadınınıñ rolü: anane ve zemane" qadınlar qurultayı olıp keçti. Bu aqta Ukrayina prezidentiniñ Qırım Muhtar Cumhuriyetindeki temsilciligi bildirdi.
Qayd etilgenine köre, bu kibi tedbirler Rusiye Federatsiyasınıñ diniy ve medeniy institutlar vastasınen öz rejimini qanuniyleştirmek ıntıluvıdır. Rusiye memuriyetiniñ vekilleriniñ "diniy qıymetler vastasınen vatanperverlik terbiyesi" aqqında beyanatları Qırım musulmanlarına Rusiyeniñ istilâcı siyasetini aqlağan mefküresini zorlamaq ıntıluvlarını qayd ete, dep aytıla haberde.
Temsilcilik qayd ete ki, böyle tedbirler teşviqat aleti ola ve halqara uquq ceetinden iç bir qanuniyeti yoq. Olar işğalci rejimni pekitmek maqsadınen yapılğan ve Rusiyeniñ diniy cemiyetlerni zapt etüv strategiyasınıñ bir qısmıdır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
