2014 senesi fevral ayında Qırım ilhaqınıñ ilk künlerinden başlap jurnalistler Rusiye akimiyeti ve paramilitar taqımları tarafından taqip etilgen edi. Daa soñra ise Rusiye jurnalistlerge qarşı cinaiy siyasiy taqipler sistemasını inkişaf ettirdi. Bunı Qırım aq qorçalayıcı gruppasınıñ reisi Ölğa Skrıpnik "Qırım platforması" Üçünci parlament sammitiniñ arfesinde matbuat konferentsiyasında bildirdi, dep haber ete Qırım.Aqiqat mühbiri.
Onıñ malümatına köre, terrorizm, casuslıq ya da silâ saqlav qabaatlavları sıq qullanıla. O, misal olaraq, Qırım.Aqiqatnıñ jurnalisti Vladislav Yesipenkonıñ davasını ketirdi, onıñ maşnasına FSB granata qoydı ve bu, oña qarşı cinaiy davanıñ uydurılmasına sebep oldı.
O, insan aqlarınıñ bozuluvlarını aydınlatqan vatandaş jurnalisti İrına Danılovıçnı de hatırladı. Skrıpnikniñ aytqanına köre, onı bir qaç kün devamında FSB-niñ azbarında tutıp, işkencege oğratqanlar.
Umumen, aq qorçalayıcınıñ malümatına köre, Qırım ilhaqınıñ 10 yılı devamında onıñ teşkilâtı biñ eki yüzden ziyade insan aqlarınıñ bozuluvını qayd etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
