Qırım.Aqiqat radiosı «Rusiye Qırımda. 6 yıl devam etken tirenüv» marafonını başlata. O, saat 8:00-dan (Qırım saatınen 9:00-da) saat 14:00-ğa (qırımlı diñleyiciler içün 15:00-ğa qadar» devam eteldek.
Marafon Ukrainada fevralniñ 26-nda qayd etilgen Qırımnıñ Rusiye işğaline qarşı tirenüv kününe bağışlana.
2014 senesi şu künü Qırımnıñ Yuqarı Şurası ögünde Ukraina topraq bütünligine qoltutuv mitingi ötkerilgen edi. Miting iştirakçilerine qarşı Rusiye tarafdarları, hususan «Rus birligi» firqasınıñ faalleri qarşı çıqtı.
Qırımda işareti olmağan Rusiye arbiyleri peyda olmazdan evel müit nasıl edi? Aqmescitte fevralniñ 26-nda neler oldı? Qırımlılar «yeşil adamçıqlarğa» nasıl yanaştı? Esas Ukrainadaki Qırım prokuraturası yarımada işğalinen bağlı adiselerni nasıl tahqiq ete? Bugün Qırımğa kimler ve ne maqsadnen bara? İşğal etilgen Qırımnıñ «halqara bağları» neden ibaret?
Bu ve diger meselelerni marafon alıp barıcıları Ukraina siyasetçileri ve memurları, jurnalist ve siyasetşınasları, aq qorçalayıcıları ve faallerinen laf etecek.
Marafon çerçivesinde fevralniñ 26-nda Kyivde olacaq ve Ukraina prezidenti Volodımır Zelenskıy iştirak etecek Age of Crimea forumından canlı yayın da olacaq.
Yarımadada marafonnı 648 AM orta dalğalarında, Qırımnıñ şimalinda 105.9 dalğasında diñlemek mümkün, Qırım.Aqiqat saytında canlı yayın olacaq. Video Qırım.Aqiqatnıñ Facebook ve YouTube saifelerinde olacaq.
