Ukrayina Mudafaa nazirliginiñ Baş istihbarat idaresi, Rusiye akimiyeti tarafından Ukrayinanıñ işğal etilgen topraqlarında hırsızlanğan 178 tarihiy qıymetli şey aqqında malümatnı aydınlattı, bu aqta müessise ilk küz ayınıñ 8-nde bildirdi.
Bu aqta malümatnı, hususan, hırsızlanğan medeniy miras obyektleri aqqında malümat olğan War&Sanctions reyestrine kirsettiler.
Qırım yarımadasında qanunsız şekilde yapılğan arheologik qazmalarda tapılğan 140-tan ziyade artefakt yañıdan tapılğan hırsızlanğan medeniyet abidesi ola. Qazma işleri Tavriya Hersonesiniñ Cenübiy civarında, Kadıkov şeerinde (Roma lagerinde) ve "İoann Predteçi kilsesi" Vizantiya mimarcılığı abidesinde yapıldı.
Ukrayina Mudafaa nazirliginiñ Baş istihbarat idaresi qoşa ki, ukrayin medeniyeti ve tarihınıñ özüne alınmasınen "Rusiye ukrayin milliy kimligini yoq etmege, istilâ ve işğalni qanunlaştırmağa tırışa".
Öz vaqtında UNESCO obyektleri namzetleri cedveline kirsetilgen "Kamennaya mogila" qoruğı Melitopol civarında yerleşken ve 2022 senesinden berli Rusiye tarafından işğal etilgen.
Oraq ayında istihbarat, işğal etilgen Qırım territoriyasında Rusiye tarafından qanunsız şekilde alınğan daa 110 medeniy qıymet aqqında malümatnı derc etti.
