Link açıqlığı

Rusiye Qırım iş adamlarınıñ bergi borcları ve para cezalarını unutmağa azır


Qırım iş adamlarına nisbeten tanılmağan Qırım Cumhuriyetiniñ Rusiyege qoşulmazdan evel belgilengen bergi borcları, para ve diger cezalar yoq etilecek.

Bunı «İzvestiya» gazetası yaza.

Rusiye maliye Nazirligi böyle bir qanun leyhası «Devlet şurası» ve «Qırım ükümetinen» beraber azırlanılğanını tasdıqladı.

«Al-azırda «Rusiye Federatsiyası terkibine Qırım Cumhuriyetini qabul etüv aqqında» federal qanunğa riayet etmek içün cumhuriyet ükümeti Qırım Cumhuriyetinde keçici müddet devamında bergi ve alımlar aqqında qanunlarnıñ hususiyetleri köz ögüne alınacaq bir sıra uquqiy vesiqalar azırlay, – dep bildirdi nazirlikniñ resmiy vekili. – Olarda cumhuriyette bergi tölev şartlarına emiyet berile, em de bu mesele muzakere etile».

Ekspertlerniñ qayd etkenine köre, borc ve para cezaları – Ukraina bücetine ait.

Qırım ve Aqyarnıñ 191 teşkilâtı ve 59 iş adamı yañı imkânlardan faydalanıp, biznesni Ukraina ve Kiyevde ğayrıdan qayd etti.

Qırımda Yekâne qayd etüv merkezinde ise 68 teşkilât ve 14 iş adamı ariza qaldırdı.
XS
SM
MD
LG