Koronavirus hastaları ketirilgen Kommunarkadaki (Yañı Moskva) hastahaneniñ baş ekimi Denis Protsenkonıñ koronavirus yuqunçı qayd etildi. Bu aqta Azatlıq Radiosı Rusiye haber agentliginiñ malümatına esaslanıp bildire.
Protsenkonıñ alı bir qarar, o, hastahanede buluna.
Daa evel Rusiye prezidenti Vladimir Putin Kommunarkadaki hastahaneni ziyaret etip, Protsenkonen körüşti ve qolunı sıqtı. Prezidentniñ matbuat kâtibi Dmitriy Peskovnıñ bildirgenine köre, Putin muntazam sürette test yapa, şimdilik bütün testler menfiy çıqtı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
