Rusiye prezidenti Vladimir Putin martnıñ 19-ında koronavirus ve ihtimallı karantin sebebinden artıq erzaq mallarını almamağa rusiyelilerni çağırttı.
"Nastoyaşçeye vremâ" haber etkeni kibi, bunı Putin Rusiye baş naziri Mihail Mişustinnen koronavirus monitoringi merkezinde laf etkende ayttı.
"Şimdi adamlar bir çoq erzaq mallarını ala. Amma kerçekten iç bir problema yoq. Teminat vaziyeti stabil. Biz bunı közetemiz", - dedi Mişustin.
Putin aytqanına köre, "adamlar vaziyetniñ raat olmasını añlap, soñra taşlanılacaq erzaqqa para masraf etmemesi müimdir".
Şimdilik Rusiyeniñ resmiy statistikasına köre, Rusiyede 93 adam koronavirusnen hastalandı.
Rusiye martnıñ 18-nden mayısnıñ 1-ne qadar çetel vatandaşları ve vatandaşlıqsız şahıslarnıñ kirişini yasaqladı.
Keçken künü dünyada 13 903 yañı koronavirus hastası qayd etildi, dep bildire Dünya sağlıq teşkilâtı. Böylece, Dünya sağlıq teşkilâtınıñ versiyasına köre, dünyada koronavirus pandemiyası başlağanından berli hastalarnıñ sayısı 167 511 insan oldı.
