Rusiye ordusı öz toprağına taba «Grad» reaktiv çoqlu ateş sistemalarını açtı, dep bildire İç işler naziriniñ mesleatçısı Anton Ğeraşçenko Ukraina telükesizlik hızmetine esaslanıp.
«Sumı vilâyetiniñ Krasnopolskiy rayonına yaqın Rusiyeniñ Popovka köyünde raşist (Rusiye – muar.) «Gradları» Ukraina sıñırından areket yönelişinde Rusiye Federatsiyası tarafına aylandırıldı. Ukraina telükesizlik hızmeti işğalciler Ukrainanı Rusiye Federatsiyasınıñ vatandaş ealisini ücümde qabaatlamaq içün provokatsiya yapmağa ve öz toprağına ateş açmağa azırlana, dep tahmin ete», – dep bildirdi Ğeraşçenko.
O, Telükesizlik hızmeti bu niyetni bozmaq içün malümatnı aydınlatmağa rica ete, dep qoştı. Ukraina telükesizlik hızmeti bu malümatnı öz resurslarında aydınlatmadı.
«Rusiye areketleriniñ varvar tabiatını bilip, Ukrainanı qabaatlamaq içün başqasınıñ bayrağı altında operatsiya ola bile, dep qorqamız», – dep yazdı Ukraina Tış işler naziri Dmıtro Kuleba Twitterde.
Ukrainada Rusiye ücüm etken soñ arbiy vaziyet ilân etildi (2022 senesi fevralniñ 24-ü saba saat 5:00-dan başlap 30 künge). Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete ve «Ukrainanı askeriysizleştirüv ve denatsifikatsiya» ola, dep bildire.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
