Rostov-na-Donu şeeriniñ Cenübiy okrug makemesinde "Hizb ut-Tahrir" işiniñ ekinci Canköy gruppasınıñ mabüsleri davası boyunca toplaşuv devamında Rusiye prokurorı altı qırımtatar içün 17 yıl sert rejimli koloniyada apis cezasını istedi. Bu aqta "Qırım birdemligi" haber ete.
Qayd etilgenine köre, devlet qabaatlayıcısı 41 yaşındaki Osman Abdurazakov, 51 yaşındaki Löman Zekeriyayev, 31 yaşındaki Ayder Asanov ve 39 yaşındaki Ekrem Kroşnı 17 yılğa, 69 yaşındaki Halil Mambetov ve 55 yaşındaki Refat Seydametovnı 17,5 yılğa üküm etmek istey.
Nevbetteki mahkeme oturışı çeçek ayınıñ 15-ne tayñn etildi.
2023 senesi qara qış ayınıñ 24-nde saba Canköy rayonında Rusiye uquq qoruyıcıları qırımtatarlarnıñ evlerinde tintüv keçirdi: Nemse Canköy (Blijnegorodskoye) köyünde Ekrem Kroş, Timofeyevka köyünde Ayder Asanov ve Refat Seydametov, Çoqraqlı Şeyh Eli köyünde (Dneprovka) Osman Abdurazakov, Canköyde Leman Zekiryayev ve Halil Mambetovnıñ evini.
Ekrem Kroşnıñ ömür arqadaşı Amideniñ «Qırım birdemligi» cemaat teşkilâtına bildirgenine köre, Qırım şimalinde tutulğan qırımtatarlar «terrorizmde» qabaatlana bile. Qırımlı musulmanlarğa mustaqil advokatlar alınmay, dep haber etilgen edi.
Qırımnıñ Rusiye yolbaşçısı Sergey Aksenov qara qış ayınıñ 24-nde saba qırımtatarlarnıñ evlerinde keçirilgen tintüvlerni izaatladı. Onıñ aytqanına köre, uquq qoruyıcılar «Ukrayına ile alâqaları» bar olğanında qabaatlanğan altı vatandaşnı tuttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
