Rusiye prokuraturası RF-te yasaq etilgen ve terroristik sayılğan Noman Çelebicihan adına göñülli qırımtatar batalyonında ve Qırımnıñ deñiz bllokadasında iştirak etüv ile qabaatlanğan Ukrayina Arbiy deñiz quvetleriniñ "Slavutiç" istihbarat gemisiniñ sabıq komandanı Oleksiy Kısılev içün 10 yıl apis cezasını istedi.
Bunıñ fevralniñ 8-nde "Qırım esnası" uquq qoruyıcı teşkilâtı bildirdi.
Uquq qoruyıcılarnıñ qayd etkeni kibi, Rusiyeniñ nezareti astında olğan Canköy rayon mahkemesinde munaqaşalarğa keçmezden evel mudafaa tarafı göñülli batalyon Ukrayina Silâlı quvetleriniñ struktur bölügi kibi qaydiyetke almaq niyeti aqqında malümat bermek içün muracaat etken, amma mahkeme red etken. Bundan ğayrı advokatı Aleksey Ladin göñülli batalyonnıñ teşkilâtçısı, Rusiye Federatsiyası vatandaşı Lenur İslâmovnıñ sorğuğa çekilmesini istegen. Mahkeme bunı da red etken.
Qararnıñ çıqarılması içün mahkemeniñ muşavere odasına ketmesinden evel soñki oturış fevralniñ 16-nda olacaq.
Rusiye quvetçileri Qırımda Ukrayina Arbiy deñiz quvetleriniñ "Slavutiç" keşfiyat gemisiniñ keçmiş komandanı Oleksiy Kısılevni Rusiyede yasaq etilgen ve terroristik sayılğan Noman Çelebicihan adına göñülli qırımtatar batalyonında iştirak etüv ile qabaatlap, qaçırdılar. Advokatı Aleksey Ladin bildirgeni kibi Kısılev Rusiye quvetçileri tarafından elektrik aqımı ile iskencelerge oğratılğan.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
