Rusiye prokuraturası qırımtatar faali, "qırımlı musulmanlar davasınıñ" mabüsi Ernest Seytosmanov içün 18 yıl apis cezasını istedi, dep haber ete "Qırım birdemligi".
Aprelniñ 12-nde Rostov-na-Donudaki Cenübiy bölgeniñ arbiy mahkemesinde Seytosmanovnıñ davası boyunca mahkeme oturışı olıp keçti. Munaqaşalar ile oturışta qabaatlav tarafı sözge çıqtı. Prokuror faal içün 2 yıl sıñırlav ile 18 yıl apis cezasını, olardan ilk 5 yılnı sert rejim koloniyasında çekmesini istedi. Qabaatlav tarafı Seytosmanovnıñ qabaatını isbatlanğan saya.
Faalniñ advokatı Ölga Şapoşnikova, qabaatlav tarafı para cezası şeklinde qoşma bir ceza berilmemesini istegenini bildirdi. Seytosmanovnıñ mudafaası qabaatlav tarafınıñ delillerinen razı degil. Dava mayısnıñ 23-nde baqılmağa devam etecek, o zaman mudafaa tarafı munaqaşalarda iştirak ete bilecek.
Seytosmanov 2022 senesi fevral ayında keçirilgen tintüvlerden soñ tutuldı. O vaqıt Qırımnıñ bir qaç rayonında Rusiye uquq qoruyıcıları dört insannı tutqan edi: Ansar Osmanov, Marlen Mustafayev, Ernest Seytosmanov ve Amethan Abdulvapov.
Tutulğanlar Rusiyede terrorist tanılğan, amma bir çoq memlekette milliy qanunlar seviyesinde sıñırsız çalışqan «Hizb ut-Tahrir» siyasiy firqasında iştirak etkeninde qabaatlandı.
«Memorial» aq qorçalayıcı merkezi «qırımlı musulmanlar davasınıñ» mabüslerini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
