Qırımnıñ Rusiye prokuraturası Rusiye nezaretinden olğan Qırım Yuqarı mahkemesiniñ Qırımtatar Milily Meclis reisi Refat Çubarovğa çıqarğan ğıyabiy ükümni temyiz etti. Bunı Qırım.Aqiqatqa advokat Nikolay Polozov bildirdi.
Çubarovnıñ ükmüni deñiştirmek talabınen devlet qabaatlayıcısı Diana Yevtuşenko tarafından imzalanğan istinaf Rusiyeniñ Soçi üçünci İstinaf mahkemesine yollanğan.
«Prokuraturanıñ fikrince, üküm esassız yımşatılğan. Prokuratura ükümniñ tasviriy-esaslı qısmından Çubarovnıñ cezasını yımşatmağa sebepler olğanını alıp taşlamağa talap etti. Ve Çubarovğa 9 yıl apis cezasını tayin etmege talap etti», – dep ayttı Polozov.
Advokatnıñ bildirgenine köre, mahkemede mudafaa tarafınıñ ve prokurornıñ istinaf şikâyetleri baqılacaq.
Qırımtatar Milliy Meclis reisi Refat Çubarovnıñ davası boyunca istinaf şikâyeti avgutsnıñ 16-nda saba saat 10-da baqılacaq. Bunı Qırım.Aqiqatqa advokat Nikolay Polozov bildirdi.
Aqmescitteki Rusiye kontrolindeki Qırım Yuqarı mahkemesi iyünniñ 1-nde Qırımtatar Milliy Meclisiniñ reisi Refat Çubarovnı 2014 senesi fevralniñ 26-nda Qırım parlamentiniñ binası ögünde «qalabalıqlarnı teşkil etkeninde» qabaatlap, ğıyabiy üküm çıqardı. Mahkeme Çubarovnı altı yıl apis cezasına ve 200 biñ rublege üküm etti.
Qırımtatar Milliy Meclisiniñ reisi Refat Çubarovnıñ imayesi iyünniñ 1-nde Rusiye akimiyeti kontrolindeki Qırım Yuqarı mahkemesi çıqarğan ğıyabiy ükümni şikâyet etmege niyetlene.
Ukraina Tış işler naziriniñ birinci muavini Emine Ceppar işğal etilgen Qırımda Qırımtatar Milliy Meclisiniñ reisi Refat Çubarovğa qarşı esnasnı ve iyünniñ 1-nde Aqmescitte çıqarılğan ğıyabiy ükümni «ayıp mahkeme» dep adlandırdı.
