Rusiye prokuraturası kezlevli ressam Bogdan Ziza içün 18 yıl sert apis cezasını istedi, dep haber ete "Gratı" neşri.
Keçken sene mayıs ayında o, cenkke qarşılığını bildirmek içün Kezlevdeki Rusiye memuriyetiniñ binasına mavı ve sarı tüste boya tökken edi. Bundan ğayrı o, "Molotov kökteli" atqan edi. Onı yaqaladılar ve teror eylemi qabaatını kösterdiler.
Rostov-na-Donuda arbiy mahkemede soñki sözüni aytır eken, Ziza iyülniñ 10-ndan aştan red etkenini ilân etti. Bundan ğayrı, o, Qırım ilhaq etilgen soñ alğan Rusiye vatandaşlığından marum etilmesini ve Rusiye apishanelerinde tutulğan bütün siyasiy mabüslerniñ azat etilmesini talap etti.
"Men, Ziza Bogdan Sergeyeviç, Ukrayina vatandaşı olaraq, açlıq ilân etem. Menim talabım - RF vatandaşlığından red etilmemni ve bütün ukrayin siyasiy mabüslerniñ azat etilmesini isteyim", - dep ayttı Ziza.
Ayrıca Ziza, mecburiy aşatılmasını yasaq etkenini qayd etti.
"Bu kibi areketelrni iskence kibi tanımaq çağıram, çünki olar menim irademe qarşı yapılacaq", - dep bildirdi o.
2022 senesi mayıs ayında Kezlevli Bogdan Ziza Kezlev memuriyetiniñ binasınıñ fasadında mavı ve sarı boya ve yanıcı qarışmanıñ izleri aşkâr etilgen zaman Rusiye quvetçileri tarafından yaqalandı. Ertesi künü Qırım televizionı kezlevliniñ qırımlılar ögünde "tövbesini" kösterdi. Bu kibi videolar Rusiyeniñ Ukrayinağa qarşı büyük istilâsı başlanğandan berli Rusiye tarafdarı telegram kanalları ve haber vastalarında cenkke qarşı narazılıqlarğa açıq takbih kibi sıq-sıq rastkelinir. Bogdan Zizanıñ yaqınları onıñ üzerinde bedeniy küç qullanğanına dair alemetlerni körip, onıñ iskencege ögratılması ihtimalınıñ olğanını bildirdiler. Tutulğan soñ Bogdan Zizanı başta "Rusiye silâlı quvetlerini itibardan tüşürgeni" içün para cezasına mahküm ettiler, soñra tevqif ettiler. O vaqıttan berli o SİZO-da buluna. Bogdan Rusiye Ceza qanunnamesiniñ üç maddesine binaen qabaatlana. Qabaatlavlar arasında terrorcılıq da bar, bunıñ içün o 15 yıl apis cezasına mahküm etile bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
