Qırımtatar faali Zair Smedlâ Rusiye kontrolindeki Qurman rayonınıñ prokuraturasından «ekstremizm qabul etilmeycegine dair» tenbi vesiqasını aldı. Vesiqanı faal içtimaiy ağlarda derc etti.
«Rayon prokuraturası 2020 senesi fevralniñ 23-nden 26-na qadar Qırım Cumhuriyetinde kütleviy izinsiz tedbirlerniñ keçirilüvi planlaştırılğanına dair malümat aldı. Qayd etilgen tedbirler vaqtında insanlarnı cemaat nizamını bozacaq qanunsız areketlerge çağıracaqlar, ekstremist areketleri boyunca provokatsiyalar, Qırım Cumhuriyetiniñ akimiyet organlarınıñ vekillerine qarşı küç tirenüvi olacaq», – dep aytıla faalge berilgen tenbide.
Onıñ aytqanına köre, Qırımda bir de bir kütleviy ve açıq tedbir olmaycaq edi, insanlar dua yapmağa istedi.
«Fevralniñ 23-ü çeçen halq, inguş halqınıñ genotsid qurbanlarını añma künüdir. Bu Qırım, Litvaniya, Beyazrusiyeniñ birinci müftisi N.Çelebicihannı añma künüdir. Bu künde toplaşıp miting keçirgen edik, Qırımdaki vaziyetni muzakere etken edik. Sürgünlikte elâk olğanlarğa dua oquğan edik. 26-ncı sanı ise – qırımtatar halqınıñ küreş künüdir. Bu künleri kütleviy tedbirlerniñ keçirilmesine imkân bermemek içün, qırımtatar halqınıñ açuvını körmemek içün olar böyle tenbiler yaza. Tünevin onlarnen tenbi yazıldı», – dep izaatladı Qırım.Aqiqatqa Zair Smedlâ.
Rusiye kontrolindeki Bağçasaray rayonınıñ prokuraturası qırımtatar milliy areketiniñ veteranı, qırımtatarlarnıñ lideri Mustafa Cemilevniñ qız qardaşı Dilâra Seytveliyevağa da ekstremizm qabul etilmeycegine dair aynı tenbi vesiqasını berdi.
Ukrainada fevralniñ 26-nda cemaatçılıq teklif etken «Qırımnıñ Rusiye işğaline qarşı tirenüv künü» qayd etile. 2014 senesi bu künü Qırım Muhtar Cumhuriyetiniñ Yuqarı Şurası ögünde Ukraina topraq bütünligine qoltutuv mitingi olıp keçti. Miting iştirakçilerine qarşı Rusiye tarafdarları, hususan «Rus birligi» firqasınıñ faalleri çıqqan edi.
