İşğal etilgen Qırımda Rusiye prokuraturası Rusiye İç işler nazirliginiñ Canköy bölüginiñ hadimleri tarafından faal, I gruppa saqatı İgor Nikitenkonıñ aqları bozulğanını körmemezlikke ura. Bunı Qırım aq qorçalayıcılarndan biri Qırım.Aqiqatqa bildirdi .
Onıñ malümatına köre, Nikitenko prokuraturağa polis hadimleriniñ areketlerine qarşı bir qaç şikâyet yolladı — hususan, evinde polis tarafından tutıp alınğan donatmalar, reabilitatsiya tehnikası ve gajetler qaytarılmasını talap etti. Buña cevap olaraq faal, prokuraturanıñ nezaret funktsiyasını yerine ketirmek istemegenini kösterecek cevap ala.
"Üç ay keçti, amma İç işler nazirligi tutıp alınğanlarnı bermey, rayon prokuraturası bütün muracaatlarımnı toqtatıp, saçma cevaplar bere. Bizge Qazandan kelgen rayonlarara prokuror Yuriy Marasov er vaqıt meni red etmek içün sebep tapa, prokuratura menim kibi insanlarğa, imkânları sıñırlanğan ve az para qazanğanlarğa prioritet bermeli, böyle insanlarnı makeme esnasına qadar qorçalamaq kerekler", — dep ayttı aq qorçalayıcı.
Nikitenkonıñ aytqanına köre, alınğan donatmanıñ fiyatı 110 biñ ruble, ve yañısını satın almağa küçü yetmey.
Qırımlı, Rusiye quvetçileri tarafından kösterilgen basqı onıñ faal vatandaş mevamınen bağlı, dep saya.
Oktâbrniñ 30-nda Rusiye quvetçileri işğal etilgen Qırımda İgor Nikitenkonı tuttılar. Keçken sene dekabrniñ 10-nda Rusiye akimiyeti Nikitenkonıñ evini elektriksiz qaldırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
