Rusiye prezidentiniñ memuriyeti qırımtatarlarnıñ matem mitingleriniñ rezolütsiyaları boyunca işçi gruppasınıñ qırımtatar faalleriniñ Reşat Ametovnıñ öldürüvinen bağlı talaplarını Qırım «ükümetine» yolladı. Bu aqqında memuriyetniñ qırımtatar faallerine bergen cevabında aytıla.
Böyle bir cevapnı qırımtatarlarnıñ 1991 senesinden başlap 2013 senesine qadar Qırım yarımadasında olıp keçken matem mitingleriniñ rezolütsiyaları boyunca işçi gruppasınıñ reberi Nedim Halilov aldı.
İşçi gruppası Rusiye ükümeti ve prezidentinden vahşiyce öldürilgen Reşat Ametovnıñ qorantasına eñ küçük balası çağına yetkenine qadar nefaqa berilmesini talap etti.
«Rusiye Federatsiyasınıñ ükümeti, Rusiye Federatsiyasınıñ prezidenti Ametov Reşat Midatoviçniñ ölümine sebep olğan adise-vaqialar içün mesülietli», – aytıla işçi gruppasınıñ aqımdaki seneniñ aprel 20-ne ait beyanatında.
Beyanatta qayd etilgeni kibi, al-azırda Ametovnıñ ölümi boyunca taqiqatnıñ ketişatı ve ölüm sebepleri aqqında Qırım ve Rusiye akimiyetiniñ cevapları yoq.
«Bundan ğayrı, işçi gruppası Ukraina ükümeti ve Prezidentinden Ametovğa «Rusiye Federatsiyasınıñ tamır qırımtatar halqınıñ Qırım yarımadasına silâlı istilâ vaqtında elâk olğan şahıs statusınıñ berilmesini» talap etti.
Qırımtatar faali Reşat Ametov Qırım Nazirler Şurasınıñ binası yanında ötkergen piket vaqtında ğayıp oldı. Ukraina kütleviy haber vastaları tarafından tarqatılğan video levhalarına köre, bellisiz adamlar onı tutıp, maşinağa alıp kettiler. Ametovnıñ cesedini martnıñ 15-de Qarasuvbazar rayonınıñ Ortalan köyündeki alanında taptılar.
