Ukraina prezidenti Volodımır Zelenskıy Hospodárske noviny slovak iqtisadiyat neşirine intervyü berip, Rusiye prezidenti Vladimir Putin ile munasebetleri aqqında tarif etti, dep bildire çarşenbe künü Prezident ofisiniñ saytı, dep haber ete Azatlıq Radiosı.
«Prezident Putinnen farqlı subet formatlarımız bar – em Normand dört taraflı format, em eki taraflı format: böyle ihtiyac olğanda ekimiz laf etemiz. Tek Ukraina içün degil, bütün Avropa içün müim olğan kerekli qararlar tapmağa yardım ete. Meselâ, keçken sene dekabr ayında Ukraina üzerinden Rusiye gazınıñ tranziti aqqında añlaştıq. Bu qıtamıznıñ qısmı içün energetik istiqrar kefil etmekte. İyülniñ 26-nda da Putinnen laf ettim – şarqtaki ateşkes rejimi arfesinde. Ve eñ uzun sessiz rejim oldı. Rusiye prezidentinen bağımız sıñırlı, amma mevzusı belli. Dialogımızdan daa çoq semerelik ister edim», – dedi Volodımır Zelenskıy.
Onıñ qayd etkenine köre, Ukraina ve Rusiye munasebetleri zor, normalleşüv aqqında aytmaq – «zor esnaslarğa ştamp qoymaqtır».
Sentâbrniñ 24-nde prezident Zelenskıy Slovak Cumhuriyetini resmiy şekilde ziyaret etecek. Yarım yıldan uzun bir müddet içinde Zelenskıynıñ Slovakiya ziyareti ekinci çetel ziyareti olacaqtır. Birinci ziyaretini Ukraina prezidenti keçken afta Avstriyağa kerçekleştirdi.
