Rusiye Federatsiya Şurası dekabrniñ 7-nde Rusiyede prezident saylavlarınıñ kününi 2024 senesi martnıñ 17-ne belgiledi. Qararnı Rusiye devlet kütleviy haber vastaları bildire.
Rey berüv kününi federal qanun belgilemekte, amma senatorlarnıñ qararı saylavalda kampaniyanı başlata. Vesiqa dekabrniñ 13-nde çıqacaq edi, dep bildirgen edi KPRF lideri Gennadiy Züganov vebir qaç kütleviy haber vastasınıñ menbaları.
Saylavlarda iştirak etmek niyetini Züganov, Devlet Dumasınıñ sabıq deputatı Boris Nadejdin, SİZOda bulunğan Donbastaki Rusiye tarafdarı aydutlarnıñ arbiy lideri İgor Strelkov (Girkin), rjevli jurnalist Yekaterina Duntsova. «Novıye lüdi» firqası öz namzetini köstermege planlaştıra, dep bildirdi matbuat hızmeti.
2020 senesi qabul etilgen Anayasa deñişmeleri şimdiki prezident Vladimir Putinge beşinci kere namzet köstermege imkân bere. O, saylavlar künü resmiy şekilde ilân etilgen soñ planlarını aydınlatmağa vade etken edi.
Putin saylavlarda namzetini kösterecek, Kreml ise qolay ğalebe qazanacaq, dep bekley, dep yazğan edi Rusiye kütleviy haber vastaları ve dünya agentlikleri Prezident memuriyetindeki iç siyaset blokunda olğan menbalarına esaslanıp. «Meduza» ve «Verstka» malümatına köre, memurlarğa Rusiye prezidentine reylerniñ 80 fayızından ziyadesini temin etmege vazife berildi.
Beklengeni kibi, Putinniñ namzetine «Spravedlivaya Rossiya — Za Pravdu» ve «Yedinaya Rossiya» parlament firqalarınıñ saylavaldı toplaşuvlarında qoltutacaqlar. Lâkin o, namzetini özü köstere bile, dep yazdı «Kommersant».
Namzetini köstermek içün işğal etilgen Ukrayına topraqlarınen beraber bütün Federatsiya subyektlerinden eñ az 300 biñ saylayıcınıñ imzasını toplamaq kerek. İmzasız namzetlerni regional parlamentlerniñ üçte birinde ya da Rusiye Devlet dumasında temsil etilgen fiqalar köstere bile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
