Aqmescitniñ Kiyev rayon mahkemesine FSB tarafından esir alınğan Ukraina askerlerine qoltutmağa kelgen qırımlılarnıñ vesiqalarını Rusiye politsiyasınıñ hadimleri teşkere. Bu aqta Qırım.Aqiqat mühbiri bildire.
Politsiya hadimleri qırımtatar faali Rolan Osmanovnıñ vesiqalarını teşkerdi.
«Bir özüm turıp, insanlar oturışuvğa avtozaklarnen ketirilgen kiriş yanında video çıqara edim. Biraz keri çekildim, kirişniñ qarşısında toqtaldım ve bunı birisi begenmedi, ğaliba. Birisi açuvlandı, ğaliba. Politsiya hadimleri kelip vesiqalarnı baqtı, tenbiyelemege tırıştılar. Men bir şey yapmadım, tenbi içün bir sebep yoq dedim. Subetimiz bitti», – dep tarif etti Rolan Osmanov.
Faalniñ qayd etkenine köre, kiriş qapusında turğan Rusiye jurnalistleri ve deñizcilerniñ aqrabalarınıñ vesiqaları teşkerilmedi.
Şaatlarnıñ bildirgenine köre, Rusiye politsiyasınıñ hadimleri mahkeme binasına kelgen daa beş qırımtatarınıñ vesiqalarını baqtı.
Daa evel haber etilgeni kibi, Rusiye kontrolindeki Aqmescitniñ Kiyev rayon mahkemesinde FSB tutqan Ukraina deñizcileriniñ cezası belgilenecek oturışuv başladı. Rusiye uquq qoruyıcıları mahkeme ögünde telükesizlik tedbirlerini quvetleştirdi.
Salı künü Kreml kontrolindeki Kiyev rayon mahkemesi FSB tutqan dört ukrain deñizcisini eki ayğa apiske aldı. «Yañı Qapu» buksiriniñ ekipaj azası Volodımır Varimez, «Nikopol» kateriniñ deñizcisi Sergiy Tsıbizov, «Nikopol» kateriniñ üyken deñizcisi Andriy Oprısko ve «Yañı Qapunıñ» üyken deñizcisi Viktor Bespalçenko 2019 senesi yanvarniñ 25-ne qadar nezaret altında qalacaqlar.
Ukraina deñizcileri Rusiye Ceza kodeksiniñ 322-nci maddesiniñ 1-inci qısmına istinaden sıñırdan qanunsız keçüvde qabaatlana.
Qırım Muhtar Cumhuriyetiniñ prokuraturası Rusiyeniñ FSBsi tarafından tutılğan Ukraina deñizcilerini cenk esiri olaraq tanıdı.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Daa soñra belli oldı ki, FSB Qara deñizde Ukraina gemilerine qarşı silâ qullandı. Kyivniñ malümatına köre, FSB açqan ateş neticesinde altı Ukraina askeri yaralandı. Rusiye FSBsi Ukraina gemilerine qarşı silâ qullanılğanını tasdıqlap, yaralanğan üç Ukraina deñizcisi aqqında haber etti.
Noyabrniñ 26-nda Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
Soñki vaqıtları Azaq deñizi Rusiye uquq qoruyıcıları, birinciden Ukraina limanlarına ketken ve andan kelgen gemilerni tutqan sıñırcıları, tarafından yapılğan provokatsiyalarnıñ yeri oldı.
