Rusiye politsiyası yanvarniñ 2-nde Qarasuvbazar rayonında qırımtatar faali Riza Asanovğa yapılğan ücümnen bağlı dava açılmasını red etti. Bunıñnen bağlı vesiqa Qırım.Aqiqatta mevcut.
«Serbest Qırım» areketiniñ faali Emine İbraimovanıñ muracaatına berilgen cevapta Qarasuvbazar rayonınıñ Rusiye İç işler nazirligi bölüginiñ yolbaşçısı Ruslan Gomenük Asanovnıñ politsiyağa yapqan muracaatınen bağlı teşkerüv yapıldı, neticede dava açılmasını red etmege qarar alındı, dep bildirdi.
Daa evel Qırım Muhtar Cumhuriyetiniñ prokuraturası qırımtatar faali Riza Asanovnıñ Qırımda oña yapılğan ücümnen bağlı arizasını qabul etti.
Yanvarniñ 2-nde saba qırımtatar faali Riza Asanov Qarasuvbazarda ücümge oğrağanını bildirgen edi. Qırım.Aqiqatqa malümat bergen Riza Asanov ücümni «faaliyetinen» bağlağanını qayd etti.
Daa soñra belli olğanına köre, Riza Asanov ücüm aqqında Rusiye politsiyasına haber etti.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
