Qırımda Canköy-Aqmescit yolunda Rusiye politsiyasınıñ hadimleri Qırımtatar bayraq kününe bağışlanğan avtoyürüş iştirakçilerini bir saat içinde dördünci kere toqtattı.
Qırım.Aqiqat mühbiriniñ bildirgenine köre, ilk üç kere aktsiya iştirakçilerini Rusiye yol-patrul hızmetiniñ hadimleri toqtatıp, vesiqalarnı teşkerdi, bir de bir bozuv aqqında aytılmağan edi.
Dördünci kere toqtatqanda politsiya hadimleri bir de bir bozuv olmağanını tasdıqlamaq içün aktsiya iştirakçileriniñ vesiqalarını teşkerdi. Politsiya hadimleri video çıqardı.
Faaller Rusiye uquq qoruyıcı organları qarşı areket ete, dep bildirgen edi.
Bugün Qırımda Qırımtatar bayraq kününe bağışlanğan avtoyürüş devam ete. Faaller marafonnıñ üçünci kününi Kefede başladı, o, aqşam Aq Qayada yekünlenecek.
Avtoyürüş çerçivesinde faaller meskün yerlerniñ adları ile levhalarnı vaqtınca deñiştire. Sızılğan rus yazı üstüne qırımtatarca tarihiy ad qoyula.
Aktsiya iyünniñ 24-nde başladı. Bir qaç kün içinde marafon iştirakçileri 30-ğa yaqın meskün yerni dolaştı.
Rusiye uquq qoruyıcı organlarınıñ vekilleri bu malümatnı açıq sürette daa izaatlamadı.
Daa evel haber etilgeni kibi, Rusiye kontrolindeki Aqmescit rayonınıñ prokuraturası qırımtatar faali Nariman Celâlnı Qırımtatar bayraq künü arfesinde «ekstremist faaliyeti» aqqında tenbiledi.
İyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın renkli tamğa tasvir etilgen kök renkli bir bayraqtır.
Qırımda, esas Ukrainada ve dünyanıñ diger memleketlerinde bayram tedbirleriniñ keçirilmesi planlaştırıla.
