Bağçasarayda Rusiye politsiyası «Hizb ut-Tahrir» teşkilâtınıñ bölügini qurğanında qabaatlanıp, 17 yıl sert rejimli koloniyada qalmasına üküm etilgen Enver Mamutovnıñ bir kişilik narazılıq aktsiyasına çıqqan anası ve narazılıq aktsiyasını Facebookta canlı yayında köstergen ömür arqadaşını tutıp aldı. Bu aqta Qırım.Aqiqat mühbiri haber ete.
Zarema Mamutova oğluna çıqarılğan ükümnen razı olmağanını bildirmek içün bir kişilik narazılıq aktsiyasına çıqtı. Yazuvlı şiarında «Oğlum terrorist degil. 17 yıl ne içün berildi?» dep yazılğan edi.
Oña ve Facebookta canlı yayında olğan Enver Mamutovnıñ apayı Aliyeniñ yanına politsiya hadimleri keldi. Politsiya hadimi Aliye Mamutovanı anasınıñ yanında qalsa, areketleri qanunsız toplaşuv olaraq tanılacaq, dep tenbiyeledi. Bundan soñ Aliye Mamutova yolnıñ diger tarafına keçip, canlı yayınğa devam etti. Politsiyanıñ üyken inspektorı Mamutovnıñ anasından pasportını köstermesini talap etip, onıñ areketlerini bir kişilik narazılıq olaraq tanımağanını bildirdi.
Eki qadın politsiya bölügine ketirildi.
«Politsiya bölügine ketirilgenine dair protokol ve malümat berüv protokolı toldurıldı, bizler 51-inci maddeden (Rusiye Anayasasınıñ özüne ya da tuvğanlarına qarşı malümat bermekten vazgeçüv maddesi – QA) faydalandıq», – dep tarif etti Qırım.Aqiqatqa Aliye Mamutova.
Şimaliy-Kavkaz okrugınıñ arbiy mahkemesi Enver Mamutovnı 17 yıl sert rejimli koloniyada qalmasına üküm etti, Ruslan Abiltarov, Remzi Memetov ve Zevri Abseitov 9 yıl sert rejimli koloniyada qalmasına üküm etildi.
Mabüslerden iç birisi qabaatını tanımadı. Olar cinaiy işniñ «siyasiy sebepleri bar», dep qayd etti.
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
