Aqmescit rayonı Bavurçı (Kamenka) qasabasınıñ sakinleri politsiya hadimleri tarafından şahsiy malümatları teşkerilgenini bildire. Bu aqta yerli sakinlerden biri Lenire (adı telükesizlik maqsadınen deñiştirildi – QA) Qırım.Aqiqat mühbirine haber etti.
«Sabadan politsiya keldi. Evlerni dolaşıp, şahsiy malümat, telefon nomeralarını soraylar. Kim nenen oğraşqanını, qayda çalışqanını soraylar».
Lenireniñ aytqanına köre, «Kollektivnıye sadı» soqağınıñ başında avtozak tura. 5-6 kişilik otrâdlar yüre, pasportlar teşkerilmey.
«Böyle şeyler daa olmağan edi. Doğrusını aytqanda, alâ daa şoktam. Ne maqsadnen yapılğanını sorasaq, politsiya hadimleri bu tek teşkerüv olğanını ayttı. Mında kim yaşağanını bilmek isteyler. Yahşı yanaşalar, evlerge sürip kelmeyler, soqaqta ya da azbarda laf eteler», – dep ayttı yerli sakin.
Rusiye quvetçileri işbu tedbirlerniñ sebeplerini aydınlatmadı. İşğal etilgen Qırımnıñ küç müessiseleriniñ matbuat hızmetleri Bavurçıdaki teşkerüvler aqqında haber etmey.
Qırım.Aqiqat vaziyetni taqip ete ve tafsilâtlı malümat almağa tırışa.
Aqmescit rayonınıñ Şumhay (Zareçnoye) köyünde «Salğır Baba» camisini Ekstremizm ile küreş («E» Merkezi) merkeziniñ hadimleri ziyaret etti.
Qırımtatar resurs merkeziniñ malümatına köre, 2019 senesiniñ başından berli Rusiye quvetçileri işğal altındaki Qırımda 80 tintüvni keçirdi, 126 insannı tuttı ve 282 kişini apiske aldı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
