Qırımda apiske alınğan Esma Nimetulayeva, Nasiba Saidova, Elviza Aliyeva ve Fevziya Osmanovanıñ cinaiy davası sebebinden Rusiye ombudsmanı Tatyana Moskalkovanıñ qabul etüvine ketken qırımtatar eyyetini dörtünci kere Moskvadan 120 kilometr uzaqlıqta toqtattılar. Bu aqta "Qırım birdemligi" delegatlarnıñ malümatına atıf etip bildire.
Tutulğanlarnıñ episine Rusiye İç işler nazirliginiñ Kaşira şeer okrugı boyunca idaresinden tenbileme yazıp berildi.
"Cinayet, poliske ait olğan memuriy bozuvlar ve cemiyetke qarşı areketlerniñ devam etmesi içün sebep olğan areketler yapılğan taqdirde, <...> qanunğa köre mesüliyetke çekile bilecegini bildirem", — dep aytıla vesiqada.
Berilgen malümatqa köre, gece saat 12-de Moskva vilâyetiniñ Kaşira şeer okrugındaki Koltovo köyünde yol qazası yüz berdi. Rusiye quvetçileri özüni cinayet tahqiqatınıñ hadimleri olaraq tanıttı, olar maskalar ve avtomatlarnen edi.
"Cinayet taqiqatı hadimi keldi, teşkerüv olacaq dep, pasportlarnı aldı. Bir kinolog köpeknen keldi, maşnanı qoqladı, bütün eşyalarımıznı çıqardılar da qoqladı. Delegatlardan birisini subetke alıp kettiler", — dep tarif etti delegatsiya azalarından biri.
Onıñ terkibine daa evel apiske alınğan qırımtatar qadınlarınıñ ana-babası, adliyeci Nazim Şeyhmambetov, qırımtatar halqınıñ faalleri ve aqsaqalları kirdi.
Soñki künde eyyetni Rusiyeniñ farqlı regionlarında uquq qoruyıcı organlarınıñ hadimleri üç kere toqtatıp, tutqan edi.
Orta küz ayınıñ 15-nde Rusiye quvetçileri Qırımda dört qırımtatar qadınını tutıp, olarnı Rusiye Ceza kodeksiniñ 205.5 maddesine istinaden (terror teşkilâtınıñ faaliyetinde iştirak etüv) "Hizb ut-Tahrir" davası boyunca qabaatladı.
Tutulğanlar arasında Esma Nimetulayeva, beş balanıñ anası ve siyasiy mabüsniñ apayı; Nasiba Saidova, bala bağçasında çalışqan student; Elviza Aliyeva ve Fevziye Osmanova.
Orta küz ayınıñ 16-nda Aqmescitteki Rusiye kontrolindeki Kiyev rayon mahkemesi dört kişini eki ayğa SİZO-ğa yolladı.
