Bazarertesi sabası kimligi belli olmağan kişi Perm devlet universitetinde ateş açtı. «İnterfaks» menbalarınıñ malümatına köre, öldürilgenler ve yaralanğanlar bar. «Govorit Moskva» haberine köre, 3 insan elâk oldı, dep haber ete Azatlıq Radiosı.
Telegram kanallarında özüni qurtarmaq içün bina pencerelerinden atlağan insanlarnıñ videoları tarqatıla.
Aliy oquv yurtunıñ içtimaiy ağlarında binada olğanlarnı odalarda qapanmağa çağıralar.59.ru neşiri ücümni kerçekleştirgeni tahmin etilgen insannıñ VKontakte içtimaiy ağında yazğanlarını taptı. Añlaşıla ki, yaşı 18, ve ücümge çoqtan azırlana edi. O, silâ iznini nasıl alğanını tarif ete.
Bu sene mayıs ayında Kazandaki №175 gimnaziyasında açılğan ateş neticesinde doquz insan elâk oldı: yedi bala ve eki büyük. Daa 23 kişi yaralandı.
Tataristan Cumhuriyetiniñ Tahqiqat komiteti Rusiye Ceza kodeksiniñ 105-inci maddesiniñ 2-nci qısmına istinaden – «öldürüv» – cinaiy dava açtı. İç işler nazirliginiñ malümatına köre, 19 yaşında İlnaz Galâviyev ücüm etti. O, bu mektepte oquğan edi, amma soñki 4 yıl devamında yaqından quvulğan kollecde oquy edi. Tahqiqatçılar yapqanlarınıñ sebeplerini ögrene. Rusiye Tahqiqat komiteti bildirgenine köre, 2020 senesi İlnaz Galâviyevniñ miy hastalığı aqqında belli oldı.
