Rusiyeniñ Rostov-na-Donu şeerindeki Şimaliy-Kavkaz okrugınıñ arbiy mahkemesi martnıñ 22-nde ukrainalı Pavlo Ğrıbnı 6 yılğa üküm etti. O, Rusiyede terror faaliyetine yardım etkeninde qabaatlandı, dep bildire «Gromadske» ukrain haber agentligi.
Taraflarnıñ munaqaşaları vaqtında qabaatlayıcı taraf mahkemeden ukrainalını altı yılğa üküm etmesini rica etken edi.
Tünevin mahkeme Ğrıbnıñ davasını yaramay alına baqmadan baqmağa devam etti.
2017 senesi avgustnıñ 24-nden Pavlo Ğrıb Beyazrusiyeniñ Gomelinde ğayıp oldı. Tuvğanlarınıñ bildirgenine köre, anda o, yaşağan Kyiv şeerinden internette tanış olğan Soçili qıznen körüşmek içün ketti. Pavlo (ğayıp olğanda 19 yaşında edi, şimdi – 20 yaşında) aynı künü Kyivge evge qaytacaq edi, amma ğayıp oldı. Tuvğanları ve imayesiniñ fikirince, onı Rusiye mahsus hızmetleri hırsızladı.
Pavlo terrorizmge yardım etkeninde qabaatlana: qıznen yazışıp, Rusiye mekteplerinden birinde terakt yapmaq imkânını muzakere etken eken.
Pavlo Ğrıbnıñ babası İgor ve advokat Marina Dubrovina ukrainalı Rostov-na-Donu SİZOsına avuştırılğanda onı diger mabüsler kötekledi, dep bildirgen ediler. Ğrıbnıñ ukrainalı ekimi Vasiliy Prıtulanıñ aytqanına köre, Pavlonıñ portal gipertenziyası – iç qanamasına sebep ola bilecek yüksek qan basımı – bar.
