QMC-nde Ukraina prezindentiniñ daimiy vekilliginde, yarımada sakinleriniñ Rusiye bergen pasportları olğanına baqmadan, olar Ukraina vatandaşları olıp qala, dep ayttılar.
Bunı Qırım.Aqiqat Radiosınıñ efirinde QMC-nde Ukraina prezidentiniñ daimiy vekili Anton Korineviç bildirdi.
"Qırımdaki rusiye vatandaşlığı denilgen şey ne Ukraina, ne de halqara topluluq tarafından tanılmay. Bu ekinci vatandaşlıq degil. Bu - yuridik quveti olmağan vesiqadır. Bu eki vatandaşlılıq degildir. Biz, işğalci devlet bergen vesiqalarnı tanımaymız. Onıñ içün qırımlılar - Ukraina vatandaşlarıdır", - qayd etti Korineviç.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
