Rusiye prezidentiniñ spikeri Dmitriy Peskov bildirgenine köre, Rusiyeniñ devlet olaraq bar oluv telükesi olsa, özek silâsı qullanıla bile. Bu aqta o, martnıñ 22-nde CNN Amerika telekanalına bergen intervyüsında ayttı.
Peskov intervyü vaqtında Rusiye özek silâsını qullanuv imkânını baqacağını inkâr etmege razı olmadı. Vladimir Putin angi vaziyette özek silâsını qullana bile degen sualge Peskov böyle cevap berdi: «Devletimiz içün ekzistentsial telüke olsa, ola bile».
Bundan ğayrı, Putinniñ vekili Rusiye Ukrainada daa iç bir arbiy maqsadına irişmedi, dep ayttı, amma «mahsus arbiy operatsiya» (Kreml Rusiyeniñ Ukrainağa qarşı ücümini böyle adlandıra – QA) «evelden belgilengen plan ve maqsadlarına köre keçirile», dep qoştı.
Rusiye prezidenti Vladimir Putinniñ emrinen Ukrainağa qarşı ücüm dört afta evelsi başladı. Ğarpta zıddiyet özek cenkine çevirile bile, dep qorqalar.
ABD prezidenti Joe Biden bu afta Washingtonda iş adamlarınen körüşip, Rusiye prezidenti Vladimir Putin, onıñ fikirince, Rusiye ordusı Ukrainada muvafaqiyetli olamağanı içün «divarğa yapıştı», dep ayttı. Bidenniñ fikirince, Putin ne qadar çoq «sıqıştırılsa», o qadar agressiv taktikağa başlay bile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: d3hzcgsd893cx5.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
